Ish-zëvendëskryeministri, Erion Braçe ka denoncuar sot institucionet financiare që japin borxhe të shpejta në vend, ndërsa thotë se janë kthyer në një makth për qytetarët. Në Facebook, Braçe ka postuar rastin e një studenti, i cili ka marrë një borxh të tillë “Iute Credit” dhe tashmë borxhi po e mbyt.
Braçe shkruan se studenti nuk mundi të paguaj këstet e borxhit të marrë nga shtatori në janar, kjo edhe për shkak të krizës së COVID, ndërsa ky institucion financiar vuri në lëvizje përmbarimin duke i kërkuar tani studentit dyfishin eborxhit dhe duke i bllokuar edhe rrogën.
“Jeni ndjerë të mashtruar dhe grabitur me borxh të shpejtë? Urdhëroni lexoni në foton e dyte; është mesazhi që mora sot nga një student që edhe punon. Ka marrë një borxh të shpejtë në një institucion financiar borxhi, jo bankë dhe borxhi po e mbyt! E zuri kriza e COVD në 2019-2020, nuk mundi të vijonte pagesat e rregullta nga shtatori në janar, vunë në lëvizje përmbarimin, tani i kërkojnë dyfishin e borxhit të marre, i bllokojnë rrogën duke e zhytur në një gropë edhe më të thellë se ajo ku ishte kur mori një borxh te shpejte!”, thotë Braçe.
Ai shton se këto institucione financiare operojnë me kontrata të paqarta dhe të dyshimta pa transparencë. Ai vë theksin edhe te nevoja e ngritjes së një agjencie publike për mbrojtjen e konsumatorëve, pasi momentalisht nuk ka asnjë institucion të ngarkuar për këtë.
