Thibaut Courtois nuk do të luajë ndeshjen e tretë dhe të fundit të Belgjikës, këtë të mërkurë kundër Bjellorusisë dhe do të kthehet në Madrid më herët nga sa ishte planifikuar për t’u bashkuar me dinamikën e grupit të udhëhequr nga Carlo Ancelotti për t’u përgatitur për duelin e La Ligas kundër Celta, që do të zhvillohet në orën 21:00 të dielën.
Portieri belg është përjashtuar nga ndeshja e tretë dhe e fundit si masë paraprake pasi ka luajtur 180 minuta në dy duelet e mëparshëm të Belgjikës, kundër Estonisë dhe Republikës Çeke, me dy fitore për skuadrën e udhëhequr nga Roberto Martinez. Courtois pësoi dy gola në ndeshjen e parë dhe mbajti portën të paprekur në takimin e dytë.
Pas ndeshjes kundër çekëve, të luajtur të dielën, Courtois tashmë ishte duke parashikuar pushimin e tij, ndërsa tha: “Unë gjithmonë dua të luaj, por është një udhëtim shumë i gjatë. Është një mundësi e mirë për një portier tjetër që të shfaqet. Mendoj se kam fituar pak pushim,”./Gijotina.com
