Policia e Korçës ka arrestuar tre persona dhe ka proceduar penalisht një shtetase tjetër, pasi akuzohen për vepra të ndryshme penale.
Mes të arrestuarve është edhe shtetasi Donald Lato, 21 vjeç, banues në fshatin Gjonomadh, Korçë, pasi dyshohet se ka kanosur me armë zjarri tip automatik, një 15-vjeçare dhe një 20-vjeçare.
Mësohet se 15-vjeçarja ka pasur lidhje me 21-vjeçarin dhe konflikti ka nisur për arsye xhelozie nga ana e Donaldos.
Burimet thonë se pas kësaj vajza kishte dalë me shoqen e saj 20-vjeçare dhe me disa persona të tjerë. Kaq ka mjaftuar, që Lato t’i kanosë me armë.
Arma ende nuk është gjetur, por policia është duke punuar për zbardhjen e ngjarjes.
Kurse dy të tjerët të cilët janë arrestuar është qytetari 44-vjeçar, me inicialet I.B, i cili është kapur nga policia e Korçës, pasi kishte vjedhur nga shteti grek 40 krerë bagëti dhe qytetari M. H., 27 vjeç, banues në Devoll, pasi u kap duke vjedhur një sasi prodhimi bujqësor në pronësi të shtetasit J. B.
E fundit, e cila akuzohet edhe për vepra të ndryshme penale, është shtetësja Sh. T., 45-vjeçe, pasi gjatë kontrollit të ushtruar pranë banesës së saj, u konstatua një objekt i ndërtuar me blloqe betoni, pa lejen e organeve përkatëse.
