Një ngjarje e pazakontë ka ndodhur dhe ka si protagonist një shtetas shqiptar. Policia e Korçës ka arrestuar një 44-vjeçar pasi u kap me 40 krerë dele, të cilat i kishte vjedhur në Greqi. 44-vjeçari u arrestua te vendi i quajtur “Përroi i Selenicës” teksa po tentonte të hynte në Shqipëri bashkë me tufën e deleve.
“Specialistët për Hetimin e Krimit Ekonomik-Financiar në Drejtorinë Vendore të Policisë Korçë, bënë arrestimin në flagrancë të shtetasit I. B., 44 vjeç, banues në Korçë, pasi u kap nga shërbimet e policisë në vendin e quajtur “Përroi i Selenicës”, në Kolonjë, duke transportuar 40 krerë bagëti, të cilat dyshohet se i ka vjedhur në shtetin grek dhe më pas i ka kontrabanduar në Shqipëri, nëpërmjet kufirit të gjelbër. Nga ana e Policisë po punohet për të vendosur përpara përgjegjësisë ligjore edhe persona të tjerë, të dyshuar si të implikuar në këtë ngjarje”, thuhet në njoftimin zyrtar të policisë për këtë ngjarje.
