Vaksinat e miratuara nga BE të Covid-19 kanë një shkallë të lartë mbrojtjeje ndaj komplikimeve të rënda, shtrimit në spital ose vdekjes. Lajmin e bëri të ditur kreu i strategjisë së vaksinimit të Agjencisë Evropiane të Barnave (EMA), Marco Cavaleri, gjatë një interviste.
Lidhur me nevojën për doza shtesë të vaksinës, Cavaleri tha se të dhënat bëhen më të qarta për njerëzit që mund të mos i përgjigjen mirë vaksinës, siç janë ata me sistem imunitar të dobësuar rëndë ose për disa pacientë të moshuar.
EMA po vlerëson aplikimin për një dozë përforcuese të vaksinës Pfizer/Biontech, gjashtë muaj pas dozës së dytë te ata mbi 16 vjeç, ndërsa rezultati pritet në javët e ardhshme.
Cavaleri tha gjithashtu se kompanitë e tjera farmaceutike së shpejti mund të dorëzojnë të dhëna për një dozë të tretë përforcuese, duke vënë në dukje se Moderna ka filluar të dorëzojë të dhëna nga provat klinike me doza përforcuese.
Për sa i përket efekteve anësore, ai tha se të dhënat globale të sigurisë tregojnë se përfitimet e vaksinave Covid-19 janë shumë më të mëdha se çdo efekt anësor i mundshëm. Ai vuri në dukje se organet kompetente të Shteteve Anëtare të BE-së janë duke analizuar vazhdimisht raportet e efekteve anësore të dyshuara.
EMA ka nevojë për më shumë informacion mbi vaksinën ruse Sputnik-V kundër koronavirusit. “Sa i përket vaksinave Sputnik V dhe Sinovac, ka shumë diskutime produktive me kompanitë, por duket se duhet të dërgohen më shumë të dhëna para se të arrihet në procesin e certifikimit,” tha Cavaleri.
