Ka përfunduar pas thuajse dy orësh, mbledhja e Kreut të PD, Lulzim Basha me Kolegjin e Kryetarëve në selinë blu. Mësohet se, Basha ka kërkuar që kryetarët e degëve të kishin celularët e tyre të fikur me qëllim shmangien e çdo mundësie që informacionet të rrjedhin në media.
Në qendër të takimit ka qenë vendim personal i tij për të larguar ish-kryeminstrin Berisha nga grupi parlamentar i PD, ndërsa mësohet se kreu demokrat ka shpjeguar arsyet që e detyruan të mbajë atë qëndrim.
Pas takimit, i vetmi që pranoi të fliste për mediat pas mbledhjes ishte kreu i PD-së në Durrës, Ferdinand Xhaferraj, i cili tha se vendimi i Bashës ishte i vështirë, por është marrë duke marrë parasysh të ardhmen e PD.
“Vendimi u mor në limite kohore, mendoj se është një nga vendimet që merr parasysh eleminimin e kostove afatgjata për PD, që do të thonë kosto të gjata për Shqipërinë. Janë kthyer në stres për Shqipërinë”, tha Xhaferaj.
Ky vendim ka sjellë debate në selinë blu, ku deputetët janë ndarë pro dhe kundra Bashës. Mbledhja e sotme, vjen një ditë pas seancës së djeshme plenare, ku Berisha u shfaq në Parlament krah Edi Palokës, Flamur Nokës dhe Tritan Shehut. Ndërsa sot dhe ish-deputeti Klevis Balliu, shprehu hapur mbështetjen e tij ndaj Berishës.
