Milani arriti një fitore shumë të rëndësishme ndaj skuadrës së Lacios me shifrat 2-0. Kuqezinjtë janë në vendin e parë në klasifikim. Trajneri i Milanit, Stefano Pioli vlerësoi në maksimum lojtarët e tij dhe ka vetëm fjalë të mëdha për Ibrahimoviç.
“Duhej treguar se Milani mund të luajë mirë, që duhet të jetë i bindur në potencialin e tij. Sot hodhëm në fushë më shumë cilësi se kundërshtarët, kemi fituar me meritë.
Zlatan nuk luante prej katër muajsh, jam i lumtur që ka hyrë mirë në fushë, që është mirë, që ka minutat e duhura për ndeshjet e ardhshme. Kur e sheh nuk plaket kurrë, përtej talentit të dukshëm dhe pasionit, është zjarri brenda që bën diferencën. Kur je i tillë, nuk i ndjen vitet që kalojnë.
Liverpuli dhe pastaj Juventusi? Ëndrrat tona janë dhe mbeten shumë të mëdha. Por duhet të ëndërrojmë natën dhe të punojmë shumë ditën që t’i realizojmë”, tha Pioli pas përfundimit të sfidës.
