Pas lajmit se kryeministri Edi Rama do të mbledhë grupin parlamentar të PS, në orën 16:00, kryedemokrati Lulzim Basha, nuk ka ndenjur duarkryq.
Mësohet se, edhe grupi parlamentar i PD, do të mblidhet gjithashtu në orën 16:00, një orë para nisjes së seancës plenare. Në seancën e sotme, do të propozohen emrat e qeverisë së re “Rama 3”, si rrjedhojë grupi mblidhet për të diskutuar aksionin opozitar.
Situata në PD ka qenë e tensionuar ditët e fundit, pas lajmit të Lulzim Bashës për të përjashtuar ish-kryeministrin dhe liderin historik të PD, Sali Berishën nga grupi parlamentar.
Megjithatë, ky vendim nuk e ndaloi Berishën të betohej si deputet i Kuvendit, ndërsa në deklaratat e dhëna për mediat është shprehur se është gati të bëjë çdo gjë që të kthejë PD-në në piedestalin e dikurshëm, duke nënkuptuar edhe rikthimin në krye të PD.
