Bashkia Pukës është bashkia e parë që i bindet urdhërit të kryeministrit Rama për vaksinimin me detyrim të qytetarëve. Gjon Gjonaj ,kryetari i bashksië së Pukës i kontaktuar nga Gijotina u shpreh se nuk do pranohet asnjë punonjës i administratës shtetërore pa u vaksinuar. Në të kundërt, këta të fundit do të kryejnë tamponin çdo fillim jave dhe t’a paraqesin pranë institucionit ku punojnë.
“Duke parë infektimet gjithnjë e në rritje në Pukë dhe mbi bazën e një informacioni të ardhur nga Drejtoria e Shëndetit Publik dhe sëmundjes së Covidit. Dua t’ju bëj thirrje si qytetar, si kryetar bashkie të përqendrohemi më shumë se sa jemi përqendruar deri tani.
Jeta është e kushtueshme, jeta është më e rëndësishme mbi këtë rruzull tokësor. Nga sot administrata shtetërore duhet të paraqesë kartelen e vaksinimit. Ata që nuk vaksinohen duhet të bëjnë tampon çdo javë. Ky tampon nuk është më sic ka qenë, pa kosto, por do paguajë, nëse e shikon më mirë të arsyeshme të bëjë këtë se sa vaksinën, kjo është çështje e tij” – shpreh Gjonaj.
Kryebashkiaku Gjonaj, ka marrë vendim edhe për rikthimin e dezinfektimeve masive në qytet dhe institucione, për shkak të rritjes së numrit të rasteve gjatë ditëve të fundit.
“Do të nisim edhe njëherë me dezinfektimin masiv në qytet dhe në të gjitha institucionet. Gjatë muajve të fundit shifrat e infektimeve janë rritur ndjeshëm, ndaj kam vendosur të marrë këtë vendim.” – u shpreh Gjonaj.
Gjonaj e ka nxjerrë këtë vendim për të mbrojtur qytetarët nga virusi i rrezikshëm, ndërkohë krejt e kundërta paraqitet në qytetin e Shkodrës. Në kryeqendrën e veriut kemi një kaos në institucionet publike, por ndryshe nga Puka, kryebashkiakja Voltana Ademi po tregohet indiferente ndaj “kërdisë” që po bën covid 19 në kryeqendrën e veriut.
Ka kohë që Ademi nuk po interesohet për situatën aktuale të Shkodrës, ndonëse në fillimet e pandemisë kërkonte me ngulm të dilte në media dhe të bënte thirrje për kujdes.
Nga ana tjetër, kemi spitalin rajonal të Shkodrës ku në vend që të merren masa për të shmangur rradhët kaotike pranë dyerve, ky institucion zgjedh të ndërroj drejtuesit dhe të “lë në mëshirë të fatit” qytetarët dhe kërkesat që ato kanë.
Covid 19 ka dalë jashtë kontrollit në qytetin e Shkodrës, ndërkohë që edhe vaksinimi në këtë qytet është i paktë.
