KPK nuk i ka gjetur asnjë problem në të tre kriteret e vlerësimit dhe vendosi të konfirmojë në detyrë prokurorin e Tiranës, Isa Jata. Në vendimin e KPK evidentohet se Jata është vlerësuar pozitivisht për kriterin e figurës dhe atë të profesionalizmit.
Nga ana tjetër bëhet me dije se, disa mungesa në deklarime të evidentuara gjatë hetimeve nuk përbëjnë shkak për shkarkimin nga puna. Në përfundim komisioni vendosi se deklarimet e bëra nga Jata dhe dokumentet shpjeguese të sjella nga ai krijuan besueshmërinë e duhur për qenë pjesë e sistemit të drejtësisë. Subjekti ka deklaruar saktësisht dhe plotësisht pasuritë e tij dhe të personave të lidhur me të, siç parashikohet në pikën 1, të nenit D, të Aneksit të Kushtetutës.
Subjekti nuk është përpjekur të fshehë apo të paraqesë në mënyrë të pasaktë pasuritë në pronësi, në zotërim ose në përdorim të tij. Pasaktësia e konstatuar në deklarimin më sipër, si dhe masa e konstatuar në mungesën e burimeve të ligjshme, nuk është në atë shkallë sa të përbëjë shkak për shkarkim. Për sa më sipër, trupi gjykues vlerëson se subjekti i rivlerësimit, z. Isa Jata, ka arritur një nivel të besueshëm në vlerësimin e pasurisë.
E.H /gijotina.com/
