Gjykata e Fierit ka lënë në fuqi masën “arrest me burg” për Elton Metajn, autori vrasjes së Sabrina Begaj, ish bashkëshortes së tij. Seanca gjyqësore është zhvilluar nën masa të forta sigurie pasi për shkak të deklaratave publike të familjarëve të Sabrina Begajt uniformat blu i druheshin një hakmarrjeje të mundshme. Gjatë procesit 31-vjeçari ka dëshmuar se ishte nën presion nga vjehrri dhe armën e kishte blerë për vetëmbrojtje.
“Vjehrri më kërcënonte më thoshte se do të më vriste, armën e bleva për vetëmbrojtje. Unë e doja Sabrinën, por isha në presion”, tha 31 vjeçari.
Ai pohoi se e ka dashur bashkëshorten dhe shpërtheu në lot para togave të zeza duke i detyruar të ndërpresin seancën për 30 minuta pushim.
Elton Metaj akuzohet për veprat penale “Vrasje për shkak të marrëdhënieve familjare”, “Mbajtja pa leje dhe prodhim i armëve shpërthyese dhe municioneve luftarake” si dhe “Prishja e qetësisë publike”.
Elton Metaj vrau me armë zjarri ish bashkëshorten Sabrina Begaj në shtëpinë e prindërve të saj, në prani të familjarëve. 23-vjeçarja kishte urdhër mbrojtje, ndërsa autori ishte i dënuar, por me një raport mjekësor që dëshmon se ka probleme mendore ai u lirua nga burgu. Babi i viktimës ka kërkuar dënim maksimal me varje të autorit, por akuza ka hedhur edhe ndaj gjykatësit që e liroi nga burgu Elton Metajn.
Nga ana tjetër familjarët e autorit pretendojnë se djali i tyre është kërcënuar vazhdimisht nga babai i Sabrina Begajt.
Sabrina Begaj dhe Elton Metaj janë prindër të një vajze. Pas konflikteve Sabrina Begaj së bashku me vajzën jetonte te prindërit e saj.
