“Studio e hapur” titullohet ekspozita e çelur në Berat nga pesë piktorë të njohur shqiptarë. Berati, qyteti i artit dhe kulturës, bëri bashkë pesë artistët e njohur, Buron Kaceli, Emijona Stasi, Vangjo Vasili, Gjergji Marko dhe Agron Polovina.
Pas një eksperience të gjatë në disa qytet të vendit, pesë piktorët e famshëm janë bërë sërish bashkë për t’i sjellë publikut në qytetin e Beratit një koleksion të përzgjedhur veprash nga krijimtaria e tyre.
Pesë artistët erdhën në Galerinë e Arteve “Eduart Lear” në Berat me një krijimtari bashkëkohore e figurative, ku dallohet mjeshtërisht në çdo vepër “peneli”, një nga elementët më të rëndësishëm të krijimtarisë së tyre të përbashkët.
Në 60 punimet e prezantuara nga artistët në të njëjtën ekspozitë në Berat, binin në sy teknikat e ndryshme të përdorura prej tyre, ku dominonin pikturat e shumë qyteteve të Shqipërisë të sjella në këndvështrime të ndryshme. Nuk mungonin as portretet dhe peisazhet më të bukura të zonave turistike të vendit, të përzgjedhura nga krijimtaria e tyre më e mirë. Në çdo punim të realizuar nga artistët, dallohej shumëllojshmëria e ngjyrave të përdorura, stili i penelit dhe akuarelit.
Për piktoren nga Durrësi, Emijona Stasi, Berati mbetet përherë një qytet i veçantë dhe atraktiv dhe sipas saj, më i lakmuari nga artistët.
“Pasi erdha në Berat me një ekspozitë të përbashkët me pikturat e mia në disa gjini e teknika të ndryshme, do të dëshiroja të kthehem sërish me një ekspozitë timen personale”- shprehet Stasi.
Ndërsa, piktori Buron Kaceli, me titullin “mjeshtër i madh”, ka theksuar se, Berati është një qendër e rëndësishme e kulturës shqiptare
Ekspozita e pesë piktorëve shqiptarë do të qëndrojë e hapur për 1-javë në Galerinë e Arteve “Eduart Lear” në Berat, ku admiruesit beratas të pikturës do të mund të shijojnë 60 punimet e ekspozuara në të.
