Është rritur numri i maturantëve mbetës këtë vit, nisur nga rezultatet e provimeve. Një pjesë e tyre u përjashtuan nga provimet e sezonit, apo nuk u korrigjuan për shkak të kopjimit. Ata i ridhanë provimet në periudhën fund-gusht/fillim-shtatori dhe një ditë më parë u njohën me rezultatet, të cilat u publikuan nga Qendra e Shërbimeve Arsimore.
Ajo që ra më tepër në sy në listat e rezultateve, ishte dominimi i notës kaluese, 5. Vlerësimet më të larta ishin notat 8 dhe 9 në lëndët me zgjedhje, që u panë rrallë mes listave, në të cilat rezultatet ishin kryesisht të ulëta.
Sot është afati i fundit që ata të shprehin pakënaqësitë e tyre, nëse nuk janë të kënaqur me notat e provimeve.
“Në zbatim të Rregullores së Maturës Shtetërore 2021, të gjithë maturantët/kandidatët që do të japin provimet e MSH 2021, sesioni i dytë, kanë të drejtë të kërkojnë fotokopjen e testit dhe të fletëpërgjigjes, pas përfundimit të të gjitha provimeve.
Çdo maturant/kandidat që kërkon kopjen e testit dhe fletëpërgjigjes përkatëse duhet të kryejë aplikimin online në portalin “e-Albania”, duke përdorur shërbimin “Kërkesë për kopje të testit të Maturës”, duke filluar deri më 15 shtator 2021, për të gjitha provimet e MSH 2021, sesioni i dytë, informon QSHA.
Kujtojmë se, viti shkollor nis më 27 shtator, ndërsa sot kryeministri Edi Rama bëri të ditur lajmin se tekstet shkollore do të jetë falas për nxënësit nga klasa e parë në të nëntën.
