Për dy javë rresh banorët e fshatit Gizë në Patos protestojnë për mbylljen e shkollës në fshat, duke i lënë fëmijët e tyre pa mësim. Në kohën kur nxënësit kudo në vend nisën mësimin plotësues, nuk ka ndodhur e njëjta gjë me 62 fëmijë të arsimit fillor e parashkollor në fshatin Gizë pasi vendimit të Bashkisë për ta mbyllur shkollën.
Bashkia ka vendosur që këta fëmijë ta zhvillojnë mësimin në qytet, por pa iu vendosur në dispozicion mjet transporti, çka e ka bërë të pamundur për nxënësit që të shkojnë në shkollë.
Të revoltuar për mungesën e transparencës dhe informacionit nga ana e Bashkisë së Patosit prindërit kundërshtojnë transferimin e fëmijëve në një shkollë tjetër, ndërsa pretendojnë se shkolla do të shembet për t’u kthyer në lulishte.
Në datë 7 shtator ata e ngritën këtë shqetësim në media, ndërsa ditën e sotme kanë hyrë në ambientet e Bashkisë, ku shprehen se nuk do të largohen pa marrë një vendim.
Kryetarja e Bashkisë Patos nuk ishte e pranishme, madje as nuk ka pranuar t’iu përgjigjet kërkesës së banorëve. Megjithatë debate dhe përplasje janë krijuar në ambientet e institucionit, pasi qytetarët ankohen se kanë 2 javë pa i çuar fëmijët në shkollë dhe akoma nuk kanë një përgjigje konkretet mbi këtë çështje.
Në debat e sipër me një nga punonjësit e Bashkisë ata thanë se vendimi për prishjen e shkollës të shpallur në rrezik shembjeje është gënjeshtër. Sipas tyre shkolla ka pësuar plasaritje të lehta nga tërmeti por nuk që është në rrezik shembjeje.
Fillimisht punonjësit e bashkisë iu shmangën kërkesës së tyre, por në pranin e kamerave kërkuan që të bisedojnë nga afër. Banorët u shprehën se nuk presin më asnjë ditë më shumë, por do e dërgojnë çështjen në instanca më të larta. Sipas tyre bashkia i shmanget përgjegjësisë dhe zvarrit çështjen qëllimisht.
Pjesë nga debati:
Qytetari: Ti duhet të kishe ardhur atje. Kemi dy javë që kemin bërë ankesën dhe po na mbesin fëmijët pa shkollë. Ti më firmos mua që ajo shkollë është në rrezik shembje ku të gjithë shtëpitë tona ashtu janë.
Pse nuk e keni marrë njëherë mundimin të vini të bisedoni nga afër me ne. Sot duhet të hapet shkolla dhe pikë, o do hapet ose ne do ndërmarrim veprime të tjera. Në do shkojmë deri në Tiranë, më vjen keq por nuk më keni lënë zgjidhje tjetër. Sepse ti Vangjel flet si kodra pas bregut.
Punonjësi : Nuk e kam thënë unë vendimin përfundimtar
Qytetari: Mos gënje ti e the që ajo shkollë është në rrezik shembje, të dëgjova vetë.
Punonjësi: Unë kamë vendosur inventarin që të mos futen fëmijët, arsyeja…
Qytetarja; Nuk ju japim më kohë të vij kryetarja ta zgjedh.
Punonjësi: Kryetarja është në Tiranë
Qytetarja: Jo jo aty është kryetarja, ajo akoma nuk ka dalë nga shtëpia, sepse në orën 9 që ne u nisëm për këtu ajo akoma ishte në shtëpinë e saj. Ne e gjejmë e në Tiranë mos keni merak, nesër do ta çojmë vetë problemin në Tiranë.
Qytetari: I kemi fëmijët në rrugë, vuajtjet e fëmijëve tani nuk i dini ju. Ti Linidta eja këtu si specialiste ke një kosto këtu. Ju ka ardhur një letër nga prefektura, ca ju thotë letra.
Punonjësi bashkisë: Do ju japim një përgjigje zyrtare, e cila vonin vetëm 3 ditë.
Qytetari: E po ne kemi dy javë që e kemi ngritur problemin, kur e keni marrë letrën ju?
Punonjësi: Dje
Qytetari: Pra nesër ju merrni vendimin.
Punonjësi: Nuk merret vendimi aq lehtë.
Qytetari: Pa e zgjatur duhet t’i jepni një rrugëzgjidhje1
Punonjësi i bashkisë për mediat: Problemi ka vajtur tek Instituti i Ndërtimit në Tiranë, do ju sjellim shkresat t’i shikoni. Ne me atë po merremi.
Qytetari: Po ndryshoni fjalët njëherë thoni në rrezik shembje, njëherë me plasaritje të lehta.
