Në fshatin Zhejë të Kurbinit, hedhja e mbetjeve pranë banesave dhe në çdo skaj të zonës, vazhdon sërish.
Ndonëse banorët vetëm pak kohë më parë janë ankuar dhe e kanë ngritur zërin për këtë shqetësim në institucionet përkatëse, përsëri situata vazhdon të mbetet e njëjtë.
Plehrat vijnë nga qyteti i Laçit me kamion dhe i zbrazin mbeturinat në kanalin që ndodhet në afërsi të banesave. Sipas banorëve, kohët e fundit ata kanë zgjedhur edhe një pikë tjetër, e cila ndodhet pranë varrezave të fshatit.
Për qytetarët ky është një shqetësim shumë i madh dhe mjaft serioz pasi autoritetet vendore nuk kanë marrë asnjë masë për parandalimin e këtij fenomeni. Rastet, sipas tyre, janë të ripërsëritura, dhe pas hedhjes së plehrave, atyre ju vihet flaka duke shkaktuar ndotje në të gjithë zonën. Banorët, gjithashtu tregojnë se, në pirgjet e mbeturinave gjenden edhe kafshë të ngordhura duke përhapur një aromë të rëndë.
Apeli i tyre mbetet marrja e masave të menjëhershme për largimin e tyre dhe vendosja kazanëve në fshat.
