Kryeministri i Kosovës, Albin Kurti i ka dërguar një letër të hapur homologut të tij shqiptar, Edi Rama duke e uruar për mandatin e tij të tretë në krye të qeverisë.
Në letrën e tij, Kurti shkruan se Shqipëria mund të llogarisë në çdo kohë mbështetjen e Kosovës, duke shtuar se mandati i tretë është një tjetër mundësi për të realizuar projekte për shqiptarët në të dyja anët e kufirit.
“Mandati juaj i tretë vjen në një kohë me plot sfida. Përballja me COVID-19, rimëkëmbja e ngritja ekonomike dhe zhvillimi e konsolidimi i institucioneve demokratike janë vetëm disa nga sfidat të cilat kërkojnë angazhimin tuaj maksimal. Sfida këto në të cilat, Republika e Shqipërisë mund të llogarisë në mbështetjen e pa rezervë të Qeverisë së Republikës së Kosovës. Unë jam me shpresë se në këtë mandat Shqipëria do të shoh progres të gjithanshëm”.
Ndërsa i uron suksese për qeverinë e re, Kurti e fton kryeministrin Rama të vizitojë Kosovën dhe të fillojnë përgatitjet për mbledhjet e përbashkta.
“Duke ju uruar suksese gjatë mandatit tuaj qeverisës dhe me kënaqësinë që shkëlqesia juaj të vizitojë Kosovën në një kohë të përshtatshme për Ju, e të fillojmë përgatitjet për mbledhjen e përbashkët të të dy qeverive, pranoni përshëndetjet më të sinqerta dhe konsideratën më të lartë,” shkruan Kurti.
Pas letrës së Kurtit, nuk ka vonuar përgjigja e Ramës, i cili shkruan në Twitter se do vizitojë Kosovën për përgatitjen e mbledhjes së përbashkët.
“Faleminderit Albin Kurti! Patjetër do ta vizitoj me shumë kënaqësi Kosovën, me t’u kthyer nga Asambleja e OKB! Le t’ia nisim menjëherë me përgatitjen e Mbledhjes së Përbashkët. Uroj me gjithë zemër dhe kam besim se do të bëjmë plot punë të mira në dobi të dy shteteve tona”, shkruan Rama.
Ditën e nesërme Presidenti pritët të dekretojë kryeministrin Edi Rama dhe 16 ministrat e kabinetit qeveritar për katër vitet e ardhme në pushtet.
