Vazhdon të jetë problematike situata e zjarreve në vend. Ditën e sotme janë lokalizuar 5 vatra të reja zjarri në qytetin e Pogradecit dhe vetëm dy prej tyre janë vënë nën kontroll. Janë fikur vatra e Gështenjasit dhe Peshkëpisë, ndërkohë po punohet në zonën e Çervenakës në një vatër që ka rënë në mesditë. Në këtë zonë po punojnë forcat zjarrfikëse dhe 15 staf mbështetës.
Situata e rëndë paraqitet në Qafë Panjë ku zjarri është aktiv prej më shumë se 4 ditësh. Sipas raportimeve të fundit situata në këtë zonë është shumë e vështirë edhe pse punohet në terren. Gjithashtu riaktivizim ka pasur edhe në zonën e mbrojtur Guri Nikës ku janë vendosur punonjës të ADZM.
Edhe pse u konsiderua si ‘luftë’ e fituar situata me zjarret në vend, ka disa ditë që vatra të reja po aktivizohen, duke përpirë mijëra hektarë pyje dhe kullotë në disa zona.
