Prezenca e OSBE-së ka qenë institucioni i parë ndërkombëtar që uroi qeverinë e re “Rama 3” pas betimit në Presidencë dhe nisjen e punës.
OSBE shprehet e gatshme për të vijuar të mbështesë përpjekjet e Shqipërisë për realizimin e reformave institucionale, për të çuar përpara angazhimet ekzistuese dhe nisur angazhime të reja.
“Prezenca e OSBE-së i shpreh urimet më të mira Qeverisë shqiptare me rastin e betimit të saj në detyrë para Presidentit të Republikës. Shqipëria ka një qeveri të re dhe shtysa të reja politike për të çuar përpara agjendën kombëtare dhe për të sjellë ndryshime të mëtejshme. Prezenca është e gatshme të vazhdojë t’i mbështesë përpjekjet e Shqipërisë për realizimin e reformave institucionale dhe presim me padurim të çojmë përpara angazhimet ekzistuese si dhe të nisim të reja si këto, me synim adresimin e nevojave të vendit tonë pritës, në përputhje me Mandatin tonë, në fushat e identifikuara si përparësi nga Qeveria në programin e saj të shpallur së fundmi: përfundimi i reformës në sistemin e drejtësisë, lufta kundër krimit të organizuar dhe korrupsionit, modernizimi i sektorit të sigurisë në vend, reforma zgjedhore”.
Sipas OSBE, rifillimi i jetës parlamentare me pjesëmarrjen e të gjitha partive politike përbëjnë bazën demokratike për përparimin e mëtejshëm politik dhe ekonomik të vendit.
“Rifillimi i jetës parlamentare me pjesëmarrjen e të gjitha partive politike dhe programi i shpallur zyrtarisht i Qeverisë së re përbëjnë një bazë solide demokratike për përparimin e mëtejshëm politik dhe ekonomik të vendit. Prezenca ka nderin që të jetë një partner i vendosur në avancimin e agjendës së reformave të Shqipërisë”, thuhet në urim.
Ambasadorja e SHBA në Tiranë, Yuri Kim, një nga mbështetëset më të mëdha të Ramës, e ka konsideruar si një mandat historik dhe ka përgëzuar kryeministrin.
Më tej, ambasadorja shkruan se SHBA është në gatishmëri të plotë të punojë për të forcuar demokracinë dhe klimën e biznesit në Shqipëri.
“Urime Kryeministrit Edi Rama për fillimin zyrtarisht të mandatit të tretë historik. Pres të punoj intensivisht për të forcuar demokracinë, mbrojtjen dhe biznesin. Urime dhe suksese!”, shkruan Kim.
Nuk ka munguar gjithashtu as urimi i ambasadorit të BE në Tiranë, Luigi Soreca, i cili shkruan në Twitter se koordinimi i fortë ndër-institucional është kyç për pranimin në BE.
“Urojmë kryeministrin Rama dhe qeverinë shqiptare që mori detyrën. Presim që integrimi në Bashkimin Evropian dhe reformat, përfshirë sundimin e ligjit, të zënë një vend të rëndësishëm në axhendë. Koordimi i fortë ndër-institucional është kyç për pranimin në BE,– shkruan Soreca.
Komisioneri për Zgjerimin, Oliver Varhelyi gjithashtu ka uruar Ramën në marrjen e detyrën për mandatin e tretë qeverisës. Përmes një postimi në Twitter, ai shkruan se dialogu konstruktiv politik është çelësi i forte i koordinimit për në Bashkimin Europian.
“Urime Edi Rama dhe qeveria e Shqipërisë në marrjen e detyrës. Pres me padurim të punoj me ju dhe pres që integrimet #EU dhe sundimi i ligjit të shfaqen në rendin e ditës. Dialogu konstruktiv politik është çelës i fortë koordinimi për në Bashkimin Europian”– shkruan Varhelyi.
Kryeministri Rama bashkë me 16 ministrat e tij shkuan paraditen e sotme tek presidenti Ilir Meta ku morën zyrtarisht detyrën. Pas betimit, kabineti qeveritar “Rama 3” u mblodh për herë të parë, ku kryeministri dha edhe porositë e fundit. Rama kërkoi të mos abuzohet me detyrën si dhe të ketë një mirëkuptim mes qeverisë dhe opozitës.D.L/Gijotina.com
