“Zjarrit” të krijuar ditën e sotme mes Kosovës dhe Serbisë për çështejen e targave, i është bashkuar edhe kreu i AAK-së, Ramush Haradinaj.
Ai shprehet se veprimet e sotme janë vazhdim i dakordimeve të mëhershme, ndërsa shtoi se nuk duhet të ketë kthim prapa nga vendosja e kësaj mase reciprociteti. Më tej ai është shprehur se qeveria Kurti ka qenë e mirëkuptueshme ndaj Serbisë.
“Mendoj se kjo qeveri është mjaft e kujdesshme në marrëdhëniet me Serbinë veçanërisht në aspektin e interesave ekonomike vërtetë i ka ndihmuar Serbisë, prej heqjes së taksës dhe pastaj lehtësira të tjera si rasti i taksës mbrojtëse për bllokat ndërtimor. Janë shumë dëshmi që flasin se qeveria Kurti ka qenë e mirëkuptueshme ndaj Serbisë. Veçanërisht ky mirëkuptim e ka mbërri kulmin te pagesa e rrymës dy herë nga 11 milionë janë shuma të mëdha” – thotë Haradinaj.
Haradinaj e sheh me habi reagimin e Serbisë, pasi sipas tij kjo gjë dihej se do të ndodhte kështu dhe nuk ka pse të kenë qëndrime të tilla.
“Mendoj se i ka përkëdhel me kujdes edhe serbët e veriut edhe Serbinë ndërsa veprimet e sotme janë pasojë e dakordimeve të mëhershme, pra nuk janë rezultat i ri por pasojë, vazhdim i dakordimeve të mëhershme. Nuk e shoh pse duhet Serbia me shpreh nervozë, sepse kjo ka qenë e pritur që do të ndodh” – theksoi Haradinaj.
Por në fund Haradinaj e ka konsideruar edhe si një shfrytëzim të kryeministri, për shkak se jemi në kohë fushate. Ai për këtë tha se shpjegimi me tabela në parlament ishte i panevojshëm, pasi po zbatohet ligji Kushtetuta.
