Pas përfundimit të seancës plenare për ngritjen e Komisioneve Parlamentare, ka dalë në një prononcim për mediet kreu i grupit parlamentar PS, Taulant Balla.
Balla ka thënë para gazetarëve se mbledhjet e Komisioneve do vijojnë online dhe se opozita duhet të gjeje arsye të tjera për t’u shqetësuar.
“Unë besoj që do njiheni me procesverbalin e konferencës së kryetarëve ku është qartësisht shpjeguar vijueshmëria e punës në komisione. Natyrshëm do ketë komisione që do zhvillojnë punën online dhe po aq natyrshëm do ketë mbledhje të komisioneve që do shfrytëzojnë dy sallat e vetme për mbledhje komisioni me distanca dhe si e tillë mendoj që opozita të gjejë arsye të tjera për tu shqetësuar, por jo këtë arsye. Nëse do ketë një seancë të rëndësishme do jetë fizikisht. Por në një punë normale, sikurse zhvillohet në PE, në parlamentin e Francës apo Bundestag, të njëjtën gjë po bën dhe kuvendi i Shqipërisë”.
Ai deklaroi pas seancës së sotme plenare se mazhoranca dhe opozita kanë rënë dakord në konferencën e kryetarëve për vaksinimin e detyrueshëm të të gjithë deputetëve.
“Në konferencën e kryetarëve ramë dakord për vaksinimin e detyrueshëm të të gjithë deputetëve. Afati i dy dozave është përcaktim që e bëjnë ekspertët, varet dhe nga lloji i vaksinës. Ky është mesazhi më i mirë që bën kuvendi sot. I bëj thirrje qytetarëve të vaksinohen. E rëndësishme t’iu drejtohemi studentëve kur po i afrohemi vitit të ri universitar, çdo student duhet të vaksinohet dhe këtë gjë duhet ta bëjë i pari Kuvendi. Mua më vjen keq, nuk e di ku e kanë dëgjuar që Shqipëria nuk është në kushtet e një gjendje të jashtëzakonshme, vendimi i qeverisë është vijues, ne vazhdojmë të jemi të kujdesshëm”, tha Balla.
Balla ka propozuar në mbledhjen e kryetarëve që nga 8 komisione të jenë 12 të tillë. Deputeti socialist ka argumentuar se me 8 komisione nuk mund të arrihen rezultate në larta në Komisionet Parlamentare, ndërsa ka pasur dhe dakordësinë e opozitës.
