Një pjesë e konsiderueshme e vajzave dhe grave në moshë pune punojnë si punëtore pa pagesë pranë biznesit të familjes, kryesisht në fermat bujqësore. Sipas të dhënave të INSTAT, të publikuara së fundmi “Shqipëria në shifra” për vitin 2020, vajzat dhe gratë kanë 1,4 herë më shumë gjasa sesa meshkujt për të qenë punëtorë pa pagesë në biznesin e familjes. Të dhënat tregojnë se 27,0 % e femrave të punësuara janë punëtore pa pagesë në biznesin familjar, kundrejt 15,5 % të meshkujve të punësuar.
Në vitin 2020, sipas të dhënave të Anketës së Forcave të Punës, shkalla e papunësisë për burrat në moshën 15-64 vjeç është 12,0 %, kundrejt 12,4 % të grave. Situata e papunësisë për burrat është përmirësuar më shumë krahasuar me gratë, duke pësuar një rënie prej 0,2 pikë përqindje krahasuar me 2019, ndërsa për gratë ka një rritje me 0,6 (pikë përqindje).
Burrat kanë një pagë mesatare mujore bruto 6,6 % më të lartë sesa gratë. Krahasuar me vitin e mëparshëm, në vitin 2020 vihet re një ulje e hendekut gjinor në paga me 3,5 pikë përqindje. Në këtë vit, sektori ekonomik, në të cilin hendeku gjinor në paga është më i lartë, është sektori i Prodhimit, ku vlera e H.Gj.P arrin në 24,9 %. Ndërsa sektori ekonomik ku H.Gj.P arrin vlerën më të ulët, prej (-5,9 %), është sektori i Ndërtimit.
Në vitin 2020, shkalla e punësimit për popullsinë 15-64 vjeç ishte 60,6 %. Në Shqipëri meshkujt janë më aktivë në tregun e punës. Në nivel vendi, sektori i shërbimeve dhe ai bujqësor kanë përqindjen më të lartë të të punësuarve me përkatësisht 43,4 % dhe 36,1 %, ndërsa punësimi në industri përbën 20,5 % të të punësuarve gjithsej në vitin 2020.
