Florian Marku i ka bërë të gjithë shqiptarët mbrëmjen e së shtunës krenar pasi fitoi titullin kampion bote në boks.
Megjithatë pak veta e njohin mirë kampionin e parë botëror të boksit në vendin tonë dhe rrugëtimin e tij, si arriti deri këtu.
Pasi u lind në qytetin e Lushnjës familja e Florianit pas viteve 90’, u zhvendos në Selanik të Greqisë.
Teksa ka folur për mediat greke Marku tregon jetën e tij prej emigranti në shtetin helen e më pas karrierën sportive.
“Ndeshjen e parë e kam bërë kur isha 13 vjeç në një kampionat bote për të rinj. U desh që të vinte babai të firmoste. Unë jam shpallur 6 herë kampion Greqie dhe 4 herë kampion bote.”-tha ai.
Pas një sherri në Selanik në moshën 18-vjeçare është kthyer në Shqipëri për t’u larguar më pas drejt Austrisë ku vijoi karrierën.
“Në moshën 18-vjeçare u përballa me disa rus në Selanik pas një sherri në një pub. Unë isha me një shokun tim i cili u përfshi në sherr dhe unë u futa për ta mbrojtur. Pas sherrit u larguam, rusët më kërkuan të më takonin dhe më thanë të paguaja dëmet në lokal sepse i prisha lokalin. Një nga ata ngeli i plagosur. Unë u largova nga Greqia dhe erdha në Shqipëri. Vërtet nuk jam 2 metra, por nuk lejoj askënd të më ofendojë. Qëndrova 1 vit e gjysmë në Shqipëri dhe shkova në Austri për të vazhduar karrierën. Bëra 13 ndeshje dhe i fitova të 13-ta dhe fillova të ngrihesha”,– deklaronte Marku për mediat greke.
Kampioni i boksit e ka provuar edhe burgun, teksa rrëfen se kaloi një vit e gjysmë mbrapa hekurave në Greqi, madje një pjesë të vogël e kaloi edhe në burgun e Austrisë.
”Një ditë para ndeshjes. Sapo shkova në shtëpi, në Linz, erdhën e më arrestuan. Të nesërmen, unë kisha ndeshjen, por Interpoli i Austrisë, në bashkëpunim me Interpolin grek, pas informacionit të marrë nga Greqia për vendndodhjen time, më arrestuan në Linz. Më erdhi keq se isha në kulmin e karrierës. Nuk e prisja të më ndodhte kjo. Isha mjaft i njohur në Austri. Nuk më del nga mendja kur polici më tha: ‘Po ti çfarë bën këtu, unë kam prerë biletën për të parë ndeshjen?’. Kjo më kushtoi një vit e gjysmë jashtë ringut sa edhe fansat kujtuan se s’do rikthehesha.”, -tha Marku.
Ai ka bërë me dije se në burgun e Selanikut, Florian Marku e kaloi kohën i vetmuar në një dhomë 3×3, duke lexuar libra.
Karriera e tij kishte nisur në kick-box, ndërsa kishte ëndërr që një ditë të fillonte edhe me UFC dhe në ‘kafaz’ ta kishte si kundërshtar, Conor McGregorin. Deri më tani 28-vjeçari gjatë karrierës në boks, ka 9 fitore, 6 prej tyre me nokaut (KO) dhe një barazim./K.T/Gijotina.com
