Një ngjarje e rëndë është raportuar pasditen e së dielës në fshatin Sterbeg, Kryevidh. Policia njofton se rreth orës 14:50, një sipërfaqe toke është përfshirë nga flakë masive zjarri në këtë fshat.
Ndërsa dyshohet se duke tentuar të shuaj zjarrin në tokën e tij, është asfiksuar nga tymi dhe për pasojë ka ndërruar jetë personi i identifikuar me iniciale R. P., 59 vjeç, banues në fshatin Sterbeg, Kryevidh, Kavajë.
Sakaq, grupi hetimor po punon për sqarimin e plotë të rrethanave të ngjarjes dhe përcaktimin e shkakut të rënies së zjarrit.
Theksojmë se javën që lamë pas janë raportuar dhjetëra vatra zjarri në disa fshatra të vendit. Në disa raste ka patur edhe mungesë nga ana e forcave zjarrfikëse, e për pasojë flakët e favorizuara nga era kanë shkatërruar terrene me sipërfaqe të mëdha toke.
