Kryeministri Edi Rama do vizitojë ditën e sotme Kosovën në kuadër të ftesës zyrtare që kryeministri Albin Kurti i bëri pas konfirmimit të mandatit të tretë në qeveri.
Takimi i parë i Ramës do të jetë me kryeministrin Kurti, me të cilin do të bisedojë për tensionet e fundit në kufirin me Serbinë për shkak të reciprocitetit të targave.
Kohët e fundit, raporti mes Ramës dhe Kurtit ka qenë mjaft i ftohtë, shkak janë bërë diskutimet dhe qëndrimet për nismën “Open Balkan”, ku shpesh herë mes dy krerëve të qeverive ka pasur përplasje në distancë.
Kurti ka thënë se kjo nismë është kundër interesave të shtetit që drejton, duke kërkuar më shumë bashkëpunim midis shteteve shqiptare. Ndërsa, shefi i qeverisë shqiptare është shprehur se Kosova nuk mund t’i japë leksione Shqipërisë dhe se duhet të respektojë vendimet e saj.
Sipas axhendës, Rama nuk do të takohet me presidenten Vjosa Osmani dhe as me kryeparlamentarin Glauk Konjufca. Më pas, kreu i qeverisë Rama do të takohet me tre liderët e opozitës: Ramush Haradinaj, Memli Krasniqi dhe Lumir Abdixhiku. Po ashtu, gjatë qëndrimit në Kosovë, Rama do të dekorojë edhe akademikun, Rexhep Qosja.
Axhenda:
08.50 – Pritje ceremoniale nga Albin Kurti, Kryeministër i Republikës së Kosovës, në oborrin e Kryeministrisë.
09.00 – Takim dypalësh me Albin Kurti, kryeministër i Republikës së Kosovës. Në përfundim të takimit, do të mbahet konferencë e përbashkët për shtyp
10.45 – Takim me Memli Krasniqi, kryetar i PDK –së (Selia e PDK-së)
11.20 – Takim me Lumir Abdixhiku, kryetar i LDK –së (Selia e LDK-së)
12.00 – Takim me Behgjet Pacolli, kryetar i AKR –së (Hotel “Sëiss Diamond”, Prishtinë)
12.20 – Takim me Fatmir Limaj, kryetar i Nismës Socialdemokrate (Hoteli “Sëiss Diamond”, Prishtinë)
12.45 – Takim me Ramush Haradinaj, kryetar i AAK-së (Selia e AAK-së)
13.30 – Drekë zyrtare me pjesëmarrjen e dy delegacioneve dhe prof. Rexhep Qosja (Vendi: Amazona Resort, Milloshevë) Përpara drekës do të mbahet një ceremoni e shkurtër për dekorimin e Rexhep Qoses, ku kryeministri Rama i dorëzon medaljen “Ylli i Madh i Mirënjohjes”, me rastin e 85-vjetorit të lindjes së tij.
15.40 – Bisedë me një grup studentësh të marrëdhënieve ndërkombëtare në Universitetin e Prishtinës (Salla 014 në Fakultetin Filozofik, Universiteti i Prishtinës)
