Kolegji i Posaçëm i Apelimit, vendosi sot ta rrëzojë ankimimin e gjyqtarit të Apelit Durrës, Arben Vrioni, për vendimin e KPK dhe e largoi atë nga sistemi i drejtësisë.
Arben Vrioni u shkarkua nga detyra më 22 nëntor 2019, pasi Komisioni konkludoi se subjekti kishte mungesë burimesh financiare të ligjshme për pasuritë dhe shpenzimet, si dhe për deklarim të pasaktë e të pamjaftueshëm. Por Vrioni e quajti si të padrejtë këtë vendim dhe e ankimoi në në KPA.
Gjatë seancës dëgjimore të zhvilluar në KPA më 15 shtator, Vrioni dhe avokati i tij, Sokol Hazizaj kërkuan që Kolegji të shpallte pavlefshmëri të vendimit të Komisionit të Pavarur të Kualifikimit për shkak të shkeljeve procedurale. Kjo kërkesë nuk u pranua nga Kolegji, ndërkohë që Vrioni dhe Hazizaj parashtruan si kërkesë kryesore çeljen e hetimit dhe konfirmimin në detyrë të gjyqtarit.
Vrioni kundërshtoi konkluzionin e KPK për pasurinë dhe këmbënguli se pasuria e tij ishte e ligjshme. Ai i konsideroi të gabuara edhe gjetjet e tjera të KPK-së. Por, nga hetimet e thelluara të kryera pas anikimit dhe duke shqyrtuar vendimin e KPK, Kolegji evidentoi se subjekti ka mungesë burimesh financiare për një apartament me sipërfaqe 157 m2 në Elbasan; si dhe për krijimin e pasurive e të kursimeve dhe kryerjen e shpenzimeve gjatë periudhës 2005-2009.
KPA ka vendosi të lërë në fuqi shkarkimin e gjyqtarit Arben Vrioni dhe të largojë atë nga sistemi i drejtësisë.
