Kryeministri Edi Rama ka folur sot lidhur me shpalljen non grata të ish-kryeministrit Sali Berisha nga DASH. Duke folur në emisionin “Open” Rama hodhi poshtë akuzat se ai ka lobuar në vendim, duke u shprehur se Amerikën nuk mund ta blejë askush.
“Për shkak të detyrës, unë di edhe gjëra të tjera. S’kam asnjë koment për shpalljen e tij non-grata, çdo koment e politizon këtu brenda, ndërkohë që kjo nuk është politikë e brendshme, sikur SHBA dhe DASH të funksiononin me lobime, imagjinoni sa diktatorë me arka me flori e diamante mund ta kishin blerë Amerikën. Ata mund të blejnë, por nuk blihen. Lobimi atje janë ca fotografi me kongresmenë, disa prej tyre nuk e kanë haberin kush është Shqipëria, ndonjë artikull këtu e atje…nëpërmjet të gjithë miliarderëve, nuk funksionon kështu sepse po të ishte ashtu do të ishin si ne, si gjithë të tjerët. Nuk ndodh, është një përrallë që ua tregon atyre që e besojnë, duke përfituar nga padija, injoranca. Nuk ndodh” – tha Rama.
Ish-kryeministri Berisha ka akuzuar kryeministrin Rama se në bashkëpunim me Sorosin kanë lobuar që DASH ta nxirrte në “non grata”.
