Partia Demokratike ka reaguar menjëherë për ngjarjen e rëndë në Lezhë, ku një punonjës policie u vra në krye të detyrës. Deputeti Enkelejd Alibeaj, nëpërmjet një reagimi në Facebook, e ka cilësuar këtë ngjarje një tragjedi të paralajmëruar, ndërsa ka hedhur akuza se policët e ndershëm janë braktisur nga shteti.
“Fatkeqësisht kjo është një tragjedi e paralajmëruar, sepse prej vitesh punonjësit e policisë që shërbejnë me ndershmëri në mbrojtje të rendit dhe sigurisë janë braktisur nga shteti i gjunjëzuar përpara krimit, i cili është në revansh për shkak të modelit të bashkëpunimit me krimin të frymëzuar nga ky regjim i korruptuar”, deklaroi Alibeaj.
Sipas deputetit të opozitës, Shqipëria e sunduar nga Edi Rama është kthyer prej vitesh në vendin kryesor të prodhimit të kanabisit në Europë, ndërsa pasojat e këtij vullneti të mbrapshtë politik janë shkatërruese për shoqërinë dhe institucionet tona. Ndër të tjera, ai tha që krimi të mos guxojë, që rendi dhe siguria të kthehet në normalitet, zgjidhja që kemi përpara është vetëm një, ndarja përfundimtare e politikës nga krimi dhe ndëshkimi i modelit të ndërtuar nga Edi Rama.
