Ministri i Brendshëm i Kosovës Xhelal Sveçla, ka dalë në një deklaratë ditën e sotme, ku është ndalur në tensionet e krijuara në veri. Ai ka ritheksuar edhe një herë rolin e Njësisë Speciale si një mbrojtëse e policisë kufitare dhe ka folur dhe për ofertën e KFOR, e cila është refuzuar nga banorët serbë që janë duke protestuar atje.
Ai tha se pala kosovare e ka pranuar ofertën që KFOR-i ka bërë për t’u larguar Njësia Speciale, por kanë qenë banorët serbë ata që kanë refuzuar, e kjo sipas tij tregon qëllimet e tyre të verteta për sa i përket tensionimit të situatës.
“KFOR-i ka ofruar angazhime shtesë dhe sigurimin e pikave kufitare me forca shtesë, ne kemi thënë se me largimin e barrikadave prezenca e Njësisë Speciale është e panevojshme, por edhe kjo ofertë e komandantit të KFOR-it është refuzuar nga këto elemente ekstremiste dhe me këtë refuzim këta kanë dëshmuar se nuk janë të brengosur me praninë e Njësisë Speciale, por qëllimet e tyre janë thellësisht politike dhe në dëm të sovranitetit të vendit tonë”- ka deklaruar Sveçla.
Kujtojmë që Kosova dhe Serbia pritet të mbajnë një takim në Bruksel për të dialoguar për qetësimin e situatës në veri.
