Duke injoruar plotësisht ngjarjen e rëndë që tronditi opinioni publik ditën e djeshme në Lezhë, ku një i ri ekzekutoi një oficer policie e më pas u vetëvra, kryeministri Edi Rama ka vijuar rutinën normalisht.
Rreth një orë më parë, Rama ka publikuar video nga dy shkolla të reja që mbajnë emrin e Vaçe Zelës dhe Kristo Frashërit, duke mos thënë asnjë fjalë për ngjarjen e rëndë.
“Mirëmëngjes, dhe me dy shkolla të reja që e mbajnë me dinjitetin e standardeve më të larta emrin e Vaçe Zelës dhe Kristo Frashërit, ju uroj një ditë të mbarë”, shkruan Rama.
Rama nuk ka komentuar lidhur me policin që ndërroi jetë në krye të detyrës, duke lënë pas dy fëmijë të mitur, ndryshe nga sa kanë bërë zyrtarë të tjerë.
Homazhet për efektivin e ndjerë do të mbahen në Pallatin e Kongreseve, nga ora 12:00 deri në orën 15:00. Ministri i Brendshëm, Bledi Çuçi deklaroi dje se kanë nisur procedurat për shpalljen “Dëshmor i Atdheut” të oficerit Hoxha.
