Tenderi i shpallur në datën 10 shtator nga Bashkia Durrës i cili kapte shifrën e 11 miliardë lekë të vjetra, për depozitimin e mbetjeve të qytetit në landfillin e “Sharrës”, ka shpallur sot kontraktorin i cili është koncensionari “INTEGRATED ENERGY BV SPV”.
Kjo procedurë aspak transparente, e cila u bë “me negocim, pa njoftim” dhe për më tepër pa asnjë dokument sqarues sesi do të përdoret kjo shumë e konsiderueshme parash që jepet nga Bashkia Durrës, hedh dyshimet se kjo është një aferë që bëhet në kurriz të taksapaguesve shqiptarë.
Një muaj më parë, bashkia e Durrësit, me po të njëjtën procedurë, hapi tenderin për rreth 287 milionë lekë për koncesionarin e Sharrës. Ndryshe nga një muaj më parë, pavarësisht se objekti i tenderit është po i njëjti, këtë herë shuma është 5-fishuar.
Taksapaguesit shqiptarë duket se do t’i paguajnë një faturë të kripur koncesionarit për mbetjet urbane, për më tepër që kontrata e koncesionit ka kohëzgjatje 10 vite.
Kujtojmë që lidhja e kontratës mes Bashkisë Durrës dhe koncensonarin e Sharrës për mbetjet e këtij qyteti është e paqartë, pasi nuk dihet se me çfarë analize kostoje është përcaktuar tarifa e “Integrated Energy BV SPV” për Durrësin. Aq më tepër që kompania pritet të përfitojë të ardhura shtesë nga skrapi dhe djegia e mbetjeve të Durrësit për energji elektrike.
Gijotina.com
