Sikurse ishte paralajmëruar më herët, PD ka dorëzuar kërkesën për ngritjen e një Komisioni Hetimor për zgjedhjet e 25 prillit, pasi kryetari Lulzim Basha i konsideron si “masakër zgjedhore”.
Ka qenë deputeti i PD, Enkeljed Alibeaj ai që ka depozituar kërkesën pranë Kuvendit, teksa tha para mediave se ky komision do të hetojë një sërë çështjes, duke filluar nga përdorimi i fondeve për ndihmën ekonomike e deri te patronazhistët.
“Dorëzuam kërkesën për ngritjen e një komisioni hetimor për zgjedhjet e 25 prillit. Si një nevojë e jo vetëm aksionit politik të PD, por si një nevojë ulëritëse që demokracia në këtë vend kërkon. Do të hetohen në transparencë të plotë. Po e filloj me mbylljen e pajustifikuar të kufijve për tu bërë të pamundur emigrantëve për të votuar. Legalizimi i më shumë se 10 mijë ndërtesave informale. Për katër vite për këto ndërtesa nuk u bë asgjë. Në prag të fushatës, një lukuni e tërë elektorale vraponte me letra për legalizimi në këmbim të votës. Do të hetohet disburismi i parakohshëm për ndihmën ekonomike. Katër vite u vodhën, u varfëruan, në periudhë zgjedhore 2.5 milion euro ndihmë ekonomike. 20 mijë familje u futën në këmbim të votës. Do të hetohet punësimi i më sa paku 13 mijë shqiptarëve me kontrata të përkohshme gjatë fushatës. Në këtë vend që emigracioni është plaga më e madhe për shkak të papunësisë në fushatë ke 13 mijë punësime të përkohshme”.
Sipas Alibeajt, Komisoni do të hetojë ndër të tjera dhe rritjen e pagave të administratës, apo mbipunësimin në kohë fushate, ndërsa nuk do mungojë as hetimi ndaj tenderave apo koncensineve.
“Do të hetohet rritja e pagave të administratës, 63 milion nga paratë e buxhetit të shtetit. Njerëz që nuk japin asnjë shërbim gjatë periudhave jashtëzgjedhore, përveçse në periudhë zgjedhore këta njerëz përdoren. Do të hetohen 120 milion të asfaltit elektoral. Në këtë periudhë të shkurtër për tu hedhur hi syve shqiptarëve. Do të hetohen 500 milion tendera, koncesione. Në vitet e tjera ka qenë një mesatare prej 160 milion. Do të hetohet 125 milion euro nga fondet publike për tërmetin e 2019. Fatkeqësisht dy dimra i kaluan jashtë, ndërkohë vetëm disa javë para zgjedhjeve 125 milion euro u shpërndan edhe te ata që nuk e kishin një fatkeqësi të tillë. kjo është një masakër zgjedhore. Do të hetohet edhe qershia mbi tortë. Do të hetohet spiunazhi moderne, 910 mijë shqiptarë të spiunuar prej procesit të patronazhistëve. Në 2021 rikthehen edhe njëherë makthet e para ’90”, u shpreh Alibeaj.
Komisioni hetimor për zgjedhjet e 25 prillit është vetëm një nga kërkesat e liderit të opozitës, Lulzim Basha pasi ndër të tjera ai ka propozuar dhe ngritjen e një Komisoni për inceneratorët dhe çështjen Beccheti.
