Menjëherë pas përurimit të nisjes së punimeve për HEC- in e Skavicës, nga Ministrja e Energjitikës Belinda Balluku dhe Ambasadorja Amerikane Yuri Kim, kanë reaguar Shoqata për Mbrojtjen e Luginës së Drinit të Zi.
Përmes një deklarate për shtyp ata tregojnë se, një përfaqësi e tyre të mbështetur edhe nga banorë të zonës kanë shkuar në Skavicë, por nuk janë lejuar të takohen me ministren Balluku e as me Ambasadoren Amerikane.
Ata shprehen se, këto lëvizje janë tinëzare pasi qeveria duhej të ishte konsultuar më parë me ta për nisjen e punimeve. Në këtë reagim ata tregojnë se, nuk janë kundër investimeve Strategjike me interesa kombëtare, por kërkojnë që të jepet një zgjidhje me drejtë pa cenuar askënd dhe pa shkatërruar mjedisin.
“Zgjidhja strategjike vjen duke u dakordësuar me popullatën që zhvendoset, duke u garantuar atyre jo vetëm banesat por punësimin, infrastrukturën etj.me qëllim që ato ta ndërtojnë jetën aty ku do të zhvendosen. Punimet që kryhen në mënyrë tinzare si nga shteti edhe nga kompania Bechtel, duket se duan të anashkalojnë banorët siç kanë vepruar me HEC-et e vogla”, shprehen përfaqësuesit e shoqatës.
Ndër të tjera ata tregojnë se, i janë drejtuar me peticion kryeministrit, Ministrisë së Energjitikës, si dhe Ambasadës së SHBA, në lidhje me projektin dhe gjithashtu kanë kërkuar informacion për projektin i cili do të zbatohet, por deri më tani asnjë përgjigje.
Ky reagim ka ardhur menjëherë pasi Ambasadorja Amerikane, Yuri Kim ka publikuar disa foto ku tregon se bashkë me Belinda Ballukun vizituan HEC-in e Skavicës për të përuruar nisjen e punimeve.
Gjatë fjalës ë saj në këtë vizitë Yuri Kim rikujtoi tre prioritetet e SHBA për Shqipërinë janë demokracia, mbrojtja dhe biznesi. Gjithashtu, ajo foli edhe për rëndësinë e investimeve bë veri të vendit, por nuk tha asnjë fjalë për banorët që kundërshtojnë fillimin në këtë mënyrë për hidrocentralin.
“Kur unë mbërrita në Shqipëri e gjëra të qartë se kemi tre prioritete, demokracinë, mbrojtjen dhe biznesin. Dhe madje vetëm mbrëmë kemi festuar 30-vjetorin vendosjes së marrëdhënieve mes SHBA dhe Shqipërisë. Sikurse jeni në dijeni kemi bërë përparim për sa i përket mbrojtjes. Shqipëria priti një nga stërvitjet më të mëdha të NATO.
Kemi bërë përparim në reformën në drejtësi dhe për sa i përket biznesit do të vazhdojmë të ecim përpara. Sikurse më keni dëgjuar jam shprehur për rëndësinë e të sjellurit më shumë mundësi ekonomike për veriun e Shqipërisë. Jam e kënaqur qe jemi këtu në Kukës”, tha Kim.
Ndërsa, ministrja vlerësoi rëndësinë e ndërtimit të këtij HEC-i, duke e cilësuar si ëndërr të shqiptarëve. Sipas saj me këtë projekt vendi kthehet në eksportues të energjisë. Por përfaqësuesit e shoqatës së Drinit të Zi nuk janë plotësisht dakord, ata këmbëngulin që projekti nuk duhet të fillojë pa marrë aprovimin e banorëve të zonës dhe të atyre si shoqatë.
E.H/ gijotina.com/
