Dy shkencëtarë amerikanë që zbuluan sesi trupi i njeriut ndjen ngrohtësinë e Diellit ose përqafimin e një personi të dashur, kanë fituar Çmimin Nobel në Mjekësi për vitin 2021. Studiuesit David Julius dhe Ardem Patapoutian do të ndajnë çmimin e këtij viti në Mjekësi “për zbulimet e receptorëve për temperaturën dhe prekjen”.
“Në jetën tonë të përditshme ne i marrim këto ndjesi si të mirëqena, por si fillojnë impulset nervore në atë mënyrë që temperatura dhe presioni të mund të perceptohen? Kësaj pyetjeje i janë përgjigjur laureatët e këtij viti të Çmimit Nobel”, thuhet në deklaratën e Komiteti i Nobelit.
Ndërkaq Julius, profesor në Universitetin e Kalifornisë në San Francisko, dhe Patapoutian, profesor në Institutin e Kërkimeve Scripps në Kaliforni, do të marrin një medalje ari dhe do të ndajnë më shumë se 1.1 milion dollarë.
Ndërkohë pritet që çmimet për Fizikë, Kimi, Letërsi, Paqe dhe Ekonomi do të ndahen gjatë ditëve në vazhdim.
Vitin që shkoi, çmimi Nobel në Fiziologji ose Mjekësi iu dha bashkërisht dr. Harvey J. Alter, Michael Houghton dhe Charles M. Rice, për zbulimin e virusit që shkakton hepatitin C, një përparim që komiteti Nobel tha se “kishte bërë të mundur analizat e gjakut dhe ilaçe të reja që kanë shpëtuar miliona jetë”.
