Kryeministri i Kosovës, Albin Kurti ka folur rreth projektit amerikan të gazsjellësit të cilin qeveria e ka refuzuar zyrtarisht. Në një intervistë për Ekonomia Online, Kurti u shpreh se informacionet që kanë dalë në media, nuk kanë të bëjnë me refuzimin e projektit, teksa konfirmoi se qeveria është në kontakt të vazhdueshëm me kompaninë MCC.
“Nuk janë të vërteta akuzat, ne jemi në kontakt me MCC, gjithashtu jemi duke diskutuar se si është më së miri në këtë fazë të përdorim fondet të cilat do të na ndihmojnë për politikat tona energjetike. Pra nëse kemi thënë që na duhen më shumë informacion dhe studime, kjo nuk do të thotë se kemi refuzuar por do të thotë që jemi të përgjegjshëm, fondet amerikane janë të mirëseardhura e të dëshiruara por edhe do të shfrytëzohen nga Qeveria jonë”, ka deklaruar Kurti.
Më 30 shtator ministrja e Ekonomisë, Artane Rizvanolli njoftoi se Kosova ka refuzuar projektin për gazsjellësin në Maqedoninë e Veriut, duke shtuar se kanë nevojë për më shumë informacione.
Lajmi shkaktoi reagime të shumta nga radhët e opozitës. Kryetari i AAK-së, Ramush Haradinaj ka kërkuar dorëheqjen e qeverisë Kurti pasi sipas tij, kjo qeveri ka marrë dy vendime të rrezikshme, marrëveshja për targat dhe gazjsellësi.
“Qeveria Kurti ka marrë dy vendime të dëmshme pra të rrezikshme për Kosovën. Njëra njihet si marrëveshja për targat, dëmet e saj do t’i përjetojmë dhe do të përballemi me to në të ardhmen, dhe tjetri vendim është refuzimi i projektit të gazit. Duke refuzuar projektin e gazit, qeveria Kurti përveç që i kanë thënë jo Shteteve të Bashkuara të Amerikës, ju ka thënë jo edhe partnerëve tjerë siç është BERZH, të cilët aktualisht janë duke punuar në masterplanin e gazit të Kosovës. Ky qëndrim dhe refuzim i qeverisë është shumë shqetësues, dhe si kurrë më parë Kurti lëkundi miqësinë tonë me Amerikën. Lëkundja që do të ketë pasoja për vendin, prandaj thirrja për dorëheqjen është legjitime dhe njëkohësisht para dorëheqjes ta rikthejnë vendimin për gazin”, ka deklaruar ai.
Ndër të tjera, ai tha se Kurti projektin amerikan e konsideroi si rus, kësisoj edhe e ka njollosur atë.
