Pas kërkesës për herësin, Gjykata Kushtetuese ka rrëzuar për herë të dytë Kodin Zgjedhor, duke shfuqizuar pragun 1% për kandidatët e pavarur. Gjykata njofton se mori në shqyrtim çështjen e Elton Debreshit, duke vendosur kështu shfuqizimin e fjalisë së dytë, të pikës 1, të nenit 162 të Kodit Zgjedhor të ndryshuar.
Sipas njoftimit zyrtar, Kodi Zgjedhor, neni 162 thotë se nuk merr mandat deputeti i pavarur që nuk kalon pragun 1%.
“Në përfundim të shqyrtimit të kësaj çështjeje, Gjykata Kushtetuese arriti në përfundimin se pjesa e fjalisë së dytë, të pikës 1, të nenit 162 të Kodit Zgjedhor, që vendos për kandidatët e propozuar nga zgjedhësit kufizim të njëjtë me atë të kandidatëve të propozuar nga partitë politike, ose nga koalicion partish politike cenon të drejtën kushtetuese për t’u zgjedhur, në lidhje me parimin e barazisë në ligj dhe ndalimit të diskriminimit”.
Si përfundim, Gjykata Kushtetuese ka vendosur shfuqizimin e pjesës që barazon kandidatët e propozuar nga zgjedhësit me kandidatët e propozuar nga partitë politike, ose nga koalicion partish politike.
Më herët, Gjykata Kushtetuese vendosi të shfuqizojë sot pikën 3 të Nenit 163 në Kodin Zgjedhor, i cili flet për herësin në shpërndarjen e mandateve për deputetë.
Kjo pikë parashikonte që kandidatët, të cilët mund të ishin vendosur në listën e sigurt të kryetarëve të partive, mund të rrezikonin vendin në parlament vetëm në rastin kur kandidatët e tjerë të renditur më poshtë siguronin vota sa mesatarja që i është dashur partisë për të siguruar një mandat – herësi.
