Ditën e sotme mbërrin në Shqipëri kryetarja e radhës së OSBE-së, ministrja e Punëve të Jashtme e Suedisë, Ann Linde. Lajmin e ka bërë të ditur Prezenca e OSBE-së në Shqipëri, ku njofton se Linde do flasë për sigurinë dhe bashkëpunimin rajonal.
“Mirëpresim nesër për vizitë në Shqipëri kryetaren e radhës së OSBE, ministren e Punëve të Jashtme të Suedisë, Ann Linde. Në takimet me homologët e saj shqiptarë, kryetarja Linde do të flasë me ta për sigurinë dhe bashkëpunimin rajonal, si dhe për programin e reformave të vendit”, thuhet në njoftim.
Linde pritet të takojë presidentin Ilir Meta dhe ministren për Evropën dhe Punët e Jashtme Olta Xhaçka. Përveç tyre, ajo do të takohet gjithashtu me Kryetaren e Kuvendit, me përfaqësues të shoqërisë civile dhe me Prezencën e OSBE-së në Shqipëri.
Po ashtu, kryetarja e OSBE-së do të marrë pjesë në nënshkrimin e Memorandumit të Mirëkuptimit ndërmjet OSBE-së dhe Shqipërisë për fuqizimin e punës kundër rrezikut të shpërndarjes dhe keqpërdorimit të Armëve të Vogla dhe të Lehta.
Në fund, dy ministret do të mbajnë një konferencë të përbashkët për shtyp në orën 11:40, në mjediset e Ministrisë së Punëve të Jashtme.
