Kryeministri Rama është sot në Slloveni ku po mbahet Samiti i Brdos, për integrimin e vendeve të Ballkanit Perëndimor të në BE, por zhvillimet nuk duken shumë pozitive në sfond.
Vetë kryeministri Edi Rama është shprehur për median spanjolle “El Pais” se nuk pret asgjë nga ky samit, kjo sepse këmbëngul se Europa nuk është në momentin e saj më të mirë.
“Ne kemi mësuar rrugën e vështirë për të mos pritur asgjë, sepse kemi parë që Evropa nuk është në një moment shumë të mirë, me shumë probleme të brendshme dhe zgjerimi nuk pritet me entuziazëm. Ne kemi dëgjuar se për shumë vite dhe asgjë nuk ka ndryshuar. Von der Leyen flet në emër të Komisionit, por Komisioni është një gjë, Këshilli është një tjetër; fjalët e bukura janë një gjë; faktet, një tjetër. Në këtë proces ka pasur gjithmonë një, dy, tre shtete anëtare që janë kundër. Tani është Bullgaria, kështu që për ne është më mirë të mos presim, sepse kur prisni duhet të ndjeni turpin e refuzimit ”, ka deklaruar Rama.
Rama këmbëngul se hyrja e Shqipërisë në BE është një “nevojë” dhe thotë se vendi nuk ka asnjë alternativë tjetër. Për këtë thotë se “Evropa është zgjedhja jonë dhe feja jonë”.
“Jo sepse na kërkohet, por sepse është e ardhmja jonë. Atëherë, ajo që ndodh në Bruksel nuk varet nga ne as nuk më shqetëson mua… Unë nuk jam pesimist, por nuk dua të humbas më shumë energji duke u ankuar”, tha ai.
Kryeministri nuk ka hequr dorë as nga dëshira për të qenë gjithmonë në qendër të vëmendjes, kur po “debatonte” me kryeministrin holandez Mark Rutte se kush do të kalonte i pari.
Të dy kryeministrat kërkonin t’i lironin rrugën njëri-tjetrit për t’u futur para, në shenjë respekti, por kokëfortësia i ktheu ata thuajse edhe njëherë në fillim të rrugës ku u takuan, pasi ecën mbrapa duke mos pranuar asnjëri të kalonte i pari. Në fund, ai që u “dorëzua” ishte kryeministri holandez, ndërsa momenti u shoqërua me të qeshura.
