Kuvendi i Shqipërisë do të mblidhet ditën e sotme në një seancë plenare në orën 10:00. Në faqen zyrtare të Kuvendit të Shqipërisë është publikuar edhe rendi i ditës ku shihet se rëndësi gjatë seancës së sotme do të ketë votimi i ndryshimeve në marrëveshjen mes kompanisë së prodhimit të vaksinave anti-Covid, Pfizer dhe qeverisë shqiptare.
“Akt Normativ nr. 29, datë 13.9.2021 “Për miratimin e tekstit të disa ndryshimeve në marrëveshjen për prodhimin dhe furnizimin nga dhe ndërmjet Pfizer Export B.V. dhe ministrisë së Shëndetësisë dhe Mbrojtjes Sociale të Shqipërisë, ministrit të shtetit për Rindërtimin dhe Institutit të Shëndetit Publik, miratuar me aktin normativ nr. 3 datë 18.1.2021,” shkruhet në njoftimin e Kuvendit.
Më herët, Kuvendi ka njoftuar se gazetarët dhe kamerat do të lejohen vetëm në oborrin e Sallës së Seancave Plenare, ndërsa deputetët duhet të paraqesin certifikatën e vaksinimit ose testin PCR negativ për t’u futur në Kuvend.
