Mjeku i njohur Ilir Alimehmeti ka deklaruar gjatë një interviste televizive se në javët e ardhshëm do ulet numri i fataliteteve nga covid-19 në vendin tonë. Ai sqaroi se situata do të përmirësohet sepse vaksinimi ul rastet e rënda dhe si rrjedhojë ulet edhe numri i vdekjeve.
Ndër të tjera ai u shpreh se nuk beson që të ketë një variant tjetër koronavirusi për shkak se imuniteti tek qytetarët po shtohet, qoftë nga vaksina apo nga imunizimi natyral.
“Shifrat janë në rënie. Ky trend rënës do të përkthehet edhe me rënie të shifrave spitalore dhe të humbjeve të jetës. Gjithsesi, rastet e reja mbeten në nivele të larta. Kur flasim për këto shifra, i referohemi rasteve zyrtare.
Askush nga ne nuk ka një sferë kristali për të parashikuar të ardhmen, pasi varet nga shumë faktorë. Së pari, nëse do të ketë një variant të ri. Megjithatë, zor se do të ketë një variant të ri, por kurrë mos thuaj kurrë. Së dyti, sa zgjat imuniteti mbas dy dozave të vaksinës? Qartësisht kemi një rënie të imunitetit nga vaksinat me kalimin e kohës. Ndërsa imuniteti natyror është në gjendje të mbajë më shumë, ulen rastet e rënda dhe nuk do të ketë më humbje jete”, tha ai.
Ndërsa shtoi se vaksinimi duhet të ndjekë hapa më të shpejtë, për të rritur nivelin e imunizimit në vend.
