Prokuroria e Posaçme kundër Korrupsionit dhe Krimit të Organizuar (SPAK) ka rihapur hetimet për vrasjen e kryepolicit të Shkodrës në vitin 2000, Arben Zylyftarit, pasi palët pretendojnë se ngjarja është manipuluar.
Nga SPAK do të merren në pyetje të gjithë personat që kanë dijeni për ngjarjen, ndërkohë që ditën e sotme është pyetur ish- avokati i Admir Tafilajt, Sokol Koçiu. Një tjetër i dënuar për vrasjen e tij është edhe Genc Tafili, i cili u lirua nga ish-gjyqtarja Enkelejda Hoxha dhe është shpallur sërish në kërkim.
Drejtori i Policisë në Shkodër, Arben Zylyftari mbeti i vrarë nga një breshëri plumbash automatiku gjatë drejtimit të një operacioni më 2 gusht 2000, që po zhvillonte për kapjen e dy personave të kërkuar, Bahri Sulejman Tafili dhe djalin e tij Admir Tafili.
Zylyftari ishte një prej emrave më të njohur në Policinë e vendit tonë. Ai ka drejtuar komisariatet dhe drejtoritë e policisë në Skrapar, Vlorë, Korçë, Lezhë dhe për pak muaj mbajti postin e drejtorit në Policinë e Shkodrës.
