Sot është mbajtur ceremonia e rivarrimit të nëntë viktimave të masakrës së fshatit Rezallë, të zhvarrosura nga varreza masive në Kizhevak dhe Rudnicë të Serbisë, ku ka marrë pjesë edhe kryeministri Albin Kurti krahas familjarëve të të zhdukurve me dhunë gjatë luftës.
Sot u rivarrosën Shefqet Zabeli, Sadri Zabeli, Dibran Rukolli, Jonuz Rukolli, Hetem Deliu, Nezir Deliu dhe Nazif Hoti, që ishin groposur në Kizhevak të Serbisë.
Bashkë me ta, u rivarrosën një pjesë e eshtrave të mbetur të Vesel Deliut dhe Behram Rukollit, nga varreza masive në Kizhevak, pasi një pjesë e eshtrave të tyre u patën gjetur vite më parë në varrezën masive, në Rudnicë të Rashkës, në Serbi.
Kurti shprehet se këto varre janë dëshmi e gjenocidit të Serbisë në Kosovë.
“Por e vërteta nuk mund të groposet e mbulohet në varreza masive. Këto varre këtu janë e vërteta, janë dëshmi e gjenocidit të Serbisë në Kosovë. Kemi obligim që të bëjmë gjithë sa mundemi e dimë që t’i prejmë rrugën drejtësisë së munguar për krimet çnjerëzore të kryera nga forcat policore serbe dhe ushtria jugosllave gjatë luftës në Kosovë.”- tha Kurti
Riatdhesimi i mbetjeve mortore të nëntë viktimave u realizua më 30 shtator 2021, nga Komisioni Qeveritar për Persona të Zhdukur, në bashkëpunim dhe me përkrahjen e familjeve të viktimave, Institutit të Mjekësisë Ligjore, Policisë së Kosovës – Sektorit për Krime Lufte, Ministrisë së Mbrojtjes dhe Komitetit Ndërkombëtar të Kryqit të Kuq.
