Gjashtë aksidente kanë ndodhur brenda një ore në aksin Pejë-Prishtinë. Këto aksidente shkaktuan disa të lënduar dhe bllokuan rrugën kryesore për orë të tëra, duke krijuar trafik të madh.
Sipas të dhënave, gjatë muajve të fundit kanë ndodhur shumë aksidente pikërisht në këtë aks rrugor, madje një pjesë e madhe përfunduan me fatalitet.
Lajmin e ka konfirmuar zëdhënësi i Policisë së Kosovës, Bajram Krasniqi. “Në rrugën nacionale Prishtinë-Pejë, në një distancë prej 1km (Koreticë, Parku i Biznesit) në një interval kohorë prej 50 min (16:00-16:50), kanë ndodhur gjashtë aksidente trafiku. Në dy aksidente janë përfshirë nga tri vetura, kurse në katër aksidente tjera janë të përfshira nga dy vetura. Nga këto aksidente, gjashtë persona kanë pësuar lëndime dhe kanë pranuar tretman mjekësor. Njësitet policore të trafikut kanë bërë shikimin e vend-ngjarjes”, tha ai.
Ndërsa iu ka bërë thirrje shoferëve të ecin me kujdes, sidomos tani që ndikojnë edhe shirat.
