Banorët e pallatit 241 në lagjen “Jani Vruho” në Berat ankohen për çarjen e tubacioneve të ujërave të zeza, që janë përzierë me tubacionin e ujit të pijshëm. Çarja e tubacioneve nëntokësore ka bërë që në çezmat e tyre të rrjedhë ujë me fekale dhe erë të keqe, që kundërmon gjithë shtëpinë.
Edhe pse prej më shumë se 20-vitesh ata kanë ngritur zërin për zgjidhjen e këtij problemi dhe sistemimin tubacioneve nëntokësore të ujërave të zeza dhe atyre të larta, deri më tani askush nuk ka ndërhyrë dhe ata po përballen çdo ditë me problemin ndotjes me fekale të ujit të pijshëm si dhe përmbytjet nga reshjet.
Reshjet e pandërprera të ditës së djeshme, e kanë bërë të pamundur daljen e 80 banorëve nga pallati ditën e sotme, ndërkohë që fëmijët nuk kanë mundur të shkojnë dot në shkollë. Ata kanë dalë të gjithë jashtë pallatit, mes baltës e llucës dhe këmbëzbathur për të zhbllokuar vetë pusetat si dhe kanë hequr ujin e baltën me duar e mjete rrethanore.
Banorët pohojnë se janë lënë në harresë totale nga qeveritarët dhe se prej vitesh uji i pijshëm bashkohet me ujërat e zeza, tubacionet e të cilave janë çarë prej vitesh. Sipas banorëve kjo gjendje është përkeqësuar më shumë gjatë këtij viti për shkak të disa punimeve që një firmë private kreu në këtë zonë, pa u dhënë as më të voglin shpjegim. Ata gjithashtu shprehen se po e blejnë çdo ditë ujin e pijshëm, ndërkohë që e kanë të pamundur të blejnë ujë për nevoja komunale.
