Ish-kapiteni i skuadrës së Vllaznisë, Gilman Lika ka analizuar kuq e blutë në këtë fillim kampionati. Ai ka theksuar se nuk i pëlqen aspak loja e shkodranëve teksa sipas tij titulli është një detyrim këtë edicion.
“Këta lojtarë që ka Vllaznia nuk paguhen kot me ato paga, por janë lojtarë që duhet të mbajnë presion për objektiva madhorë.
Vllaznia vjet nuk u mor seriozisht që pati atë nisje. Më pas e pati të vështirë të mbronte vendin e parë. Kësaj here, Vllaznia shikohet me një skuadër nga më të fortat për të mos thënë më e forta. Prandaj, Vllaznia ka për ta pasur më të vështirë këtë kampionat se edhe konkurrenca është rritur më shumë sesa kampionatin që shkoi.
Mendoj se për Vllazninë tri pikët janë një detyrim në këtë sfidë. Pas tri barazimeve një tjetër rezultat negativ që do ta quaja edhe barazimin nuk do t’i shërbente Vllaznisë. Dhe skuadrës i duhet vetëm fitore.
Dinamo për mua ka bërë një skuadër të mirë. Këtë e ka treguar në takimet e para. Vllaznia nuk do ta ketë të lehtë. E shikoj si një përballje rivalësh”, tha Gilman Lika.
