Nënkryetari i Lëvizjes Socialiste për Integrim Petrit Vasili, gjatë ndërhyrjes së bërë në sallën e parlamentit për procedurë, theksoi se ulja e kohës së diskutimit të deputetëve me justifikimin se përhap virusin është një tregues i përdorimit të pandemisë në qëllim të interesave të mazhorancës.
“Censurën e fjalës harrojeni, do diskutoj atë që quaj unë të udhës. Nuk ka qenë ky thelbi i letrës që unë kam kërkuar dhe jam i keqardhur për një sjellje që ju e bëni se nuk dini jo se doni.
Një kusht është që koha këtu nuk diskutohet dhe kjo i bën të gjithë të barabartë. Mund të ketë cështje të tjera që mund të biem në dakordësi që mos të flitet as edhe një minutë sepse mund të jemi dakord.
Po ju flas në emër të profesionit. Kjo është një sallë propandemi, nuk është kundër pandemisë. Nëse doni të vazhdoni të përdorni politikisht këto lloj formash këto janë vulgare. Boll e përdorët pandeminë, ky është një turp që nuk është dëgjuar asgjëkundi. Edhe analogjitë që përdorni me Bashkimin Europian nuk qëndrojnë. Ne kemi qëndruar 18 orë këtu e vetëm sot na qenkë problem kjo gjë. Nuk po flas për stadiumin, po ju them të ktheni në normalitet sallën e kuvendit. Nuk ka pronarë të fjalës tonë” – tha Petrit Vasili në Kuvend.
Por për përplasjen mes opozitës në lidhje me kohën e kufizuar, Kryetari i Grupit Parlamentar Socialist Taulant Balla iu përgjigj kërkesës së deputetëve të opozitës për të zbatuar sipas tyre rregulloren e kohës së diskutimit në seancë plenare.
Balla tha se Kuvendi do të zbatojë rregulloren e vendosur me konsensus në Konferencën e Kryetarëve, që diskutimet të bëhen me kohë të kufizuar deri në momentin që të gjithë parlamentarët të jenë të vaksinuar.
“Është rënë dakort që deri në vaksinimin e plotë të të gjithë deputëtëve si rregull i miratuar me konsensues nga konferenca e kryetarëve ne kemi dakordësuar ti kthehemi punës në komisione pa asnjë limit e po me konsensus është rënë dakort dje që të shtohet një orë për shumën e çështjeve.
Sot në Strasburg në PE 700 eurodeputetë do kenë 4 orë kohë diskutimesh.
Jemi në pandemi botërore, të gjitha parlamentet, s’ka një në Europë që nuk i zhvillon seancat me kohë të reduktuar qëndrimi në seancë plenare.
Kuvendi i Shqipërisë, apeli im është t’i bindemi asaj kërkese që ne ia bëjmë qytetareve po kemi deputete që s’e kanë kryer ende, procesin e vaksinimit.
Kur të kemi situatën nën kontroll edhe brenda kësaj salle do ecim hap pas hapi.
Mos abuzoni duke iu referuar rregullores. E kuptoj mund të keni halle të tjera por kjo seancë do zhvillohet sipas këtij vendimi, jam shpresë plotë se në fund të kësaj seance do kemi dakortësi për disa cështje të rëndësishme që në fund të fundit ka filluar të ketë një dialog konstruktiv shumicë pakicë në Kuvend “ – tha Balla.
