Dy efektivë të qarkut Vlorë janë pezulluar nga puna pasditen e kësaj të enjteje, pasi akuzohen për kultivim droge. Në vendimin e saj SHÇBA vendosi që 2 punonjësit e policisë në Vlorë, të identifikuar me iniciale L.D., me detyrë N/Specialist dhe M.A., me detyrë Specialist për Rendin (SPZ) të pezullohen nga puna dhe tu ndalohet dalja jashtë vendit.
Gjithashtu një tjetër punonjës policie në Stacionin e Policisë Kufitare Shtikë, ka rënë në prangat e policisë për drejtim mjeti në mënyrë të parregullt.
Bëhet fjalë për efektivin e identifikuar si S.SH., i cili ditën e djeshme, në vendin e quajtur ish-Pazari në qytetin e Ersekës, duke drejtuar mjetin e tij është aksidentuar dhe është përplasur me murin rrethues të një banese.
Nga veprimet e para hetimore ka rezultuar se automjeti ishte pa dokumentacionin përkatës dhe targat i përkisnin një automjeti tjetër të çregjistruar. Automjeti u sekuestrua në cilësinë e provës materiale. Nga testi i kryer me aparat Drager, punonjësi i policisë S.SH. ka rezultuar në gjendje të dehur.
