Deklarata e Kryeministrit Rama ku u shpreh se Shqipëria do të nisë satelitët në hapësirë, ka shkaktuar shumë reagime ditën e sotme. Në lidhje me fjalët e tij, ka reaguar dhe deputeti i PD Arben Ristani, i ftuar në “Fax Neës”, i cili ka ironizuar duke thënë se shpreson që astronauti i parë të mos jetë Lulzim Basha. Ky reagim i tij vjen për shkak të situatës së krijuar në këtë parti nga ngjarjet e fundit. Vendimet e kreut të PD, kanë bërë që përfaqësues të kësaj partie t’i kundërvihen atij, madje duke i kërkuar edhe dorëheqjen. Ndër të tjera, Ristani ka pohuar se PD do të dalë nga kjo krizë, pasi i ka kapacitetet e duhura.
Për situatën e Partisë Demokratike ka reaguar dhe ish-deputeti Bujar Nishani, i cili thekson se nuk është e largët periudha e ringritjes. Më tej ai ka komentuar dhe komisionin për përzgjedhjen e kandidatëve, ku ka bërë dhe zbuluar dhe disa prapaskena. Nishani ka qenë pjesë e këtij komisioni, nga ku pohon se emrat e kandidatëve zgjidheshin nga Basha, pavarësisht asaj çka vendoste vetë komisioni.
“ Kur kryetari i partisë e thërret dikë në zyrë dhe i thotë: – më vjen keq që komisioni nuk të ka përzgjedhur, por mos u mërzit se raportin e ke me Lulzim Bashën. Kjo është ordinere jo intrigë. Kjo tregon nivelin e degradimit të menduarit të një njeriu që pretendon nesër të bëhet kryeministër “ është shprehur Nishani, duke treguar dhe revoltën e tij.
Bujar Nishani ka komentuar gjithashtu dhe përjashtimin e Berishës, ku e cilëson jotransparente dhe si vendim i marrë në fshehtësi. Sipas ish-presidentit, një lider nuk vepron në atë mënyrë që veproi Lulzim Basha, duke vendosur në dyshim pozitën e këtij të fundit.
