Skuadra e Tiranës sfidon Teutën këtë të dielë në stadiumin “Elbasan Arena”. Bardheblutë do të kenë shumë mungesa për shkak të situatës me covid 19 që përfshiu kryeqytetasit. Lojtarët janë rikthyer me skuadrën por forma është e dobët për të luajtur një sfidë të tillë. Trajneri i Tiranës Orges Shehi komentoi situatën tek bardheblutë.
“Seferi, Ngo dhe Ismajlgeci nga testet e sotme (djeshme) kanë dalë negativë, por dihet që duhet kohë që të jenë gati. Kanë qenë këtu, nuk janë stërvitur me skuadrën. Avashavash, paralel me të tjerët, ata duhet të mbarojnë me mjekimin dhe të kthehen me grupin. Dihet shumë mirë që duhet një kohë më e gjatë se ajo që kemi për ndeshjen që ata të jenë gati, por do të shpresoja që të rikuperoheshin sa më shpejt. Gjendja e skuadrës është ajo.
Hodhëm në fushë të gjithë lojtarët që kishim në stërvitje. Morëm lojtarë prej të rinjve dhe U-21-shit për të plotësuar kontingjentin. Kemi kaluar një javë shumë të vështirë. Kush ka qenë në stërvitje, e di shumë mirë që mezi plotësonim lojtarët për të bërë stërvitje. Shto këtu Najdovskin dhe Kukën që kishin virozë, por janë stërvitur. Kemi kaluar një javë shumë të vështirë. Po kompletohemi pak nga pak. Dua që të mbushet grupi me lojtarët që kemi dhe të përgatitemi për Teutën.
Ama ndeshja është shumë shpejt dhe ata që e kanë kaluar COVID-in, sipas mjekëve, do të duhet shumë kohë që të jenë gati për stërvitje. Gjysmën e formacionit nuk e kam të gatshëm për arsyet që prekëm më lart, gjithsesi djemtë do të bëjnë më të mirën në fushë. Për të plotësuar organikën, duhet të huazojmë lojtarë nga ekipet zinxhirë”, theksoi Shehi.
