Protesta kundër rritjes së çmimit të energjisë elektrike, shportës ushqimore dhe bukës do të zhvillohet sërish ditën e sotme përballë kryeministrisë. Avokati dhe organizatori i protestës, Adriatik Lapaj ka njoftuar qytetarët se sot në orën 18:00 do të jetë përballë kryeministrisë për të reaguar kundër rritjes së çmimeve. Me anë të një postimi të bërë në rrjetin social ‘Facebook’, ai shkruan se shteti duhet të gjejë mekanizmat për të ruajtur balancën sociale, duke shtuar më tej se sipas tij, shteti është më shumë se taksidar. Ndër të tjera, Lapaj njofton se po përgatit propozime konkrete ligjore për këtë çështje.
E gjithë peotesta nisi me rritjen e çmimit të bukës e më pas të produkteve të tjera të shportës dhe rritjes së çmimit të energjisë elektrike. Kreu i Qeverisë Edi Rama deklaroi se qytetarët duhet të përgatiten krizën energjitike; rritjen e çmimit të gazit me rreth 250%, atë të karbonit me rreth 80% dhe të naftës. Rama tha se kjo krizë do prekë jetën e familjeve dhe bizneseve, por qeveria do u qëndrojë pranë shtresave në nevojë, biznesit të vogël dhe konsumatorëve familjarë.
