Përfaqësuesi ligjor i Partisë Demokratike, Ivi Kaso ka ngritur akuza ndaj vendimeve të marra nga Komisioni i Ankesave dhe Sanksioneve.
Gjatë një prononcimi për media, Kaso tha se sot me rrëzimin e kërkesës për qarkun e Vlorës vendosi standard të dyfishtë duke bërë krahasimin me pretendimet e Partisë Socialiste, të cilat u pranuan.
Ndër të tjera, Kaso nuk i kurseu akuzat ndaj KAS duke pretenduar se po ndiqnin një linjë, e cila pengonte partitë për të provuar pretendimet e tyre lidhur me shkeljet e gjetura në procesin zgjedhor të 25 prillit. Megjithatë ai shtoi se PD do të vijojë të depozitojë ankimime.
Ivi Kaso: Shqyrtimi i kërkesës sonë në Vlorë, për të tretën herë KAS me shumicë votash ka refuzuar kërkesën për marrjen e provave. PD ka kërkuar dhe gjenden në disponiblitetin e insitutcioneve të ndryshme. Provat e kërkuara nga ne janë thelbësore për të verifikuar masakën e 25 prillit. Dëshmojnë çdo aspekt të sjelljes së institucioneve në këtë proces zgjedhor. Sjellja që sipas evidencave që disponojmë ka qenë në kundërshtim me ligjin. Kjo kërkesë e refuzimit që iu bë sot marrjes së provave nga ana e KAS është më e domosdoshme se kurrë për të zbuluar dimensionin e plotë të masakrës zgjedhore. Pasi për shkak të provave që po merren në këtë proces, veçanërisht të opozitës ditë pas dite po dëshmohen parregullsi dhe shkelje të ndryshme.
Prandaj kërkesa dhe nevoja për administrimin e të gjitha provave dhe veçanërisht të sjelljes së insitutcioneve sot është ulëritëse. Dhe heshtja e KAS është një shkelje e çdo standardi zgjedhor. Çdo veprim i KAS për të hedhur poshtë kërkesat tona për marrjen e këtyre provave shkon në drejtim të kundërt me transparencën dhe interesin e qytetarëve për të mësuar çfarë ka ndodhur në procesin zgjedhor që po e lëmë pas. U vendos një standard i dyfishtë ku vetë anëtarët kërkuan hetim të plotë për pretendimin e PS lidhur me zgjedhësit që votuan më shumë se një herë. Dhe po nga ana e tyre nuk pranuan kërkesën e opozitës për të marrë prova të domosdoshme. Ne do të vazhdojmë në rrugën tonë dhe me kërkesat tona për të shpallur të pavlefshme zgjedhjet në zona të tjera zgjedhore. Nuk do të reshtim së bëri publike faktet dhe provat.
